اخر الأخبارقصص وحكايات بنات

مذكرات دكتورة أمراض نسا وولاده

منقول

بافكر جديا اعلق ورقة علي باب العيادة و اكتب فيها ملحوظات للحالات تقراها قبل ما تدخل لي:

– اللي لسة متجوزة: مش لازم علي فكرة اول الراجل ما يعدي جنبك تبقي حامل… عادي جداً يعني تقعدي كام شهر … حاولي تتبسطي بيهم… متلهوجة علي إيه جتك خيبة
– اللي جاية تركب “لولو” هو اسمه لولب علي فكرة يعني عشان انا باتخنق… و ما بيتربطش و لا باتبت عليه عشان انا مش ميكانيكي سعادتك….و هو أصلا مش شقي قوي زي ما سمعتي… يعني ولا بيسرح عالقلب ولا حيطلع من بؤك… آه… خالتك و مرات اخوكي مابيفهموش.. ايوة ايوة صدقي


– الحامل اللي بتروح تشور اي حد و يوصف لها علاج و تاخده… ماتجيش تسألني ينفع مع الحمل ولا لأ… انا باقاوم شيطاني بالعافية اني أقول لك طب ما ينفعش وريني يا فالحة حتعملي إيه بقي… اسأليني “قبل” ما تاخدي اي دوا مش بعد…
– بالنسبة للأخ الزميل الصيدلي.. رأيك في العلاج اللي باكتبه آخر اهتماماتي علي فكرة… يعني عارفة ان الابيلات دوا ضغط و السيدوفاچ دوا سكر و الپرجنيل بيدوه للرجالة ….. الخ الخ من ملاحظاتك اللي مش عارفة كنت حاعيش من غيرها ازاي…………….اصرف الدوا و انت ساكت
– نمرة تليفوني اللي معاكو دي للضرورة…. الضرورة!!!! فمع احترامي الشديد لتساؤلك تلبسي پيچاما بأستك مع الحمل ولا لأ او تليفونك الساعة ٢ الفجر عشان تسألي اذا ينفع تصبغي شعرك و الحاجات دي فأنا أسفة أصدمك و أقول لك الحقيقة المرة انها لا تندرج تحت بند الضرورة…. تصوري؟!!!
– الدكتور بني ادم برضه علي فكرة… بينام و يعمل پيپي و احيانا بيتهف في مخه و ياخد دش… مش لازم يطلع يلاقي فيه ٣٥ ميسد كول…. حاولي تتخيلي و لو لحظة انه يمكن مثلا كان مزنوق؟
– الحالة اللي بتقعد عالنت… انا فعلا بعد ١٤ سنة خدمة في ثانوي مستنية المعلومة اللي قريتيها في منتدي فتكات عشان اعرف أعالج حالاتي… ارجوكي… روحي تابعي مع فتكات
– بالنسبة لشعر العيل اللي بيعمل حموضة!!!!! راس البيبي بتبقي تحت علي فكرة.. مالهاش ايوتها علاقة بالمعدة… و حاقعد ربع ساعة كاملة اشرحلك تأثير الحمل علي صمام المرئ و الارتجاع… لو المرة الجاية جبتي سيرة كلام ماما عن شعر العيل تاني حاحدفك بحاجة!
– الحاجات السخنة مش بتسقط… ماكانش حد غلب
– الأخت اللي بتيجي مع الحالة و مالهاش تلاتين لازمة… انا باجاوب علي ال٥٠٠ سؤال اللي حالتي بتسألهم و ماباشتكيش و باستحمل تدخلك في وسط الكلام ذوق مني مش اكتر إنما مش لازم أول ما الحالة تدخل اوضة الكشف أرد كمان علي تساؤلاتك بخصوص بنت أختك اللي في الإمارات ولا مرات ابنك التانية اللي متابعة مع دكتور في مصر مش مريحها… تحبي اديكي بباقي الكشف لبان كمان؟
– الباشمهندز جوز المدام الحامل… سعادتك انا اخترت نسا أصلا عشان ماتعاملش مع رجالة… يعني مخنوق قوي انها في البيت بتشتكي من أعراض الحمل و بتدخل ضارب لي بوز و قرفان قوي انها تعبانة و الكلمة الشهيرة “شوفي لنا حل” دي؟ الحل ماكنتش اتشاقيت ياخويا… إنما خلاص أهي حامل و شايلة البطيخة علي قلبها الغلبانة… مش عاجبك كمان انها تشتكيلك من غممان النفس ولا رجليها اللي ورمت ولا انها بقت تقيلة؟! روح اشتكي لحد غيري انا حاسمعك كلام يضايقك… بلاش مرقعة بقي دانتو لو جالكو زكام بتعلنوا الطوارئ….
– و انا باعمل السونار… مش لازم كل زيارة تسألوني هو لسة ولد ولا هي لسة بنت!!!!! انا اعرف واحد نام و صحي لقي نفسه لسة راجل برضه علي فكرة… بتحصل يعني احيانا!!! و مش حيغيّر رأيي في نوع البيبي الحلم اللي حلمته طنت فلانة انها حتجيب بنت مش ولد ولا طنت علانة اللي بصت عالبريمة اللي في شعر اخوه و قالت اللي جاي بنت الخ الخ من هذا الفلكلور اللطشيف…. و بالنسبة للقفشة بتاعة هو البيبي لون عينيه إيه ولا شعره طويل و لا شبه مين فينا …… أوكي………… هأ هأ هأ…. خلاص؟
– و اخيراً… و انتي جاية تولدي… ابوس رجل أمك (و حماتك)…. بلاش بيض مسلوق و ملوخية….. اتعميت بقي حرام عليكو!!!!!

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى
إغلاق